ແຟນໆ “ເສືອໃຕ້” ທຳໃຈ… ໂຣເບິດ ເລວານດອຟສະກີ້ ຍອດດາວຍິງເລືອດໂປລ ກຽມແລ້ວ ອາດຈະອຳລາທີມ ບາເຢິນ ມິວນິກ ຊ່ວງຊຳເມີນີ້ ພ້ອມຈີ້ສະໂມສອນໃຫ້ພິຈາລະນາຂໍ້ສະເຫນີທີ່ເຂົ້າມາ

ໂຣເບິດ ເລວານດັອຟສະກີ້ ກອງຫນ້າຄົນສຳຄັນ ຂອງ ບາເຢິນ ມິວນິກ ຢືນຢັນວ່າຕົນເອງຈະບໍ່ເຊັນສັນຍາສະບັບໃຫມ່ກັບຕົ້ນສັງກັດ ແລະອາດຈະຫລິ້ນເກມນັດສຸດທ້າຍໃຫ້ກັບທີມຮຽບຮ້ອຍຫລັງຍິງ 1 ປະຕູໃນເກມ ບຸນເດສລິກາ ເຢຍລະມັນ ນັດປິດລະດູການ 2021/22 ທີ່”ເສືອໃຕ້” ບຸກໄປສະເຫມີ ເຟົາເອຟແອວ ໂວຟສະບວກ 2-2 ມື້ວັນເສົາທີ່ 14 ພຶດສະພາ ທີ່ຜ່ານມາ

ປະຈຸບັນເລວານ ດອັບສະກີ ຍັງເຫລືອສັນຍາກັບ ບາເຢິນ ພຽງແຕ່ເຖິງຊ່ວງຊຳເມີປີ 2023 ແລະເຊື່ອກັນວ່າ ມີຄວາມເປັນໄປໄດ້ສູງທີ່ຜູ້ກ່ຽວຈະອຳລາຖິ່ນ ອັລລິອັລ ອາຣິນ່າ ຊ່ວງຊຳເມີນີ້ ໂດຍທີ່ ບາເຊໂລ່ນາ ຖືກເບິ່ງວ່າເປັນທີມເຕັງທີ່ຈະໄດ້ໂຕໄປຮ່ວມທີມ

“ມັນມີຄວາມເປັນໄປໄດ້ສູງເລີຍວ່າ ນີ້ຄືເກມສຸດທ້າຍຂອງຂ້ອຍກັບ ບາເຢິນ ຂ້ອຍໃຫ້ຄຳຕອບແບບ 100% ບໍ່ໄດ້ດອກແຕ່ມັນອາດຈະເປັນແບບນັ້ນ ເຮົາຢາກທີ່ຈະຫາທາງອອກທີ່ດີິທີ່ສຸດທັງຂ້ອຍແລະສະໂມສອນ”

“ແນ່ນອນວ່າ ຂ້ອຍຈະບໍ່ເຊັນສັນຍາສະບັບໃຫມ່ ຂ້ອຍໄດ້ບອກກັບທາງສະໂມສອນແລ້ວວ່າ ຖ້າມີຂໍ້ສະເຫນີເຂົ້າມາ ເຮົາຈຳເປັນຕ້ອງພິຈາລະນາ” ຍອດດາວຍິງທີມຊາດໂປແລນໄວ 33 ປີກ່າວ

Robert Lewandowski