ມິເກລ ອາເຕຕ້າ ກຸນຊື ອາເຊນ່ອລ ສຸດເຊັງຫລັງທີມບຸກໄປແພ້ ນິວຄາສເຊິ່ນ ຢູໄນເຕັດ 0-2  ກາຍເປັນຍັງເຫລືອໂອກາດພຽງຫນ້ອຍດຽວທີ່ຈະຕິດທັອບໂຟ ພ້ອມອັດລູກທີມຫລິ້ນກັນບໍ່ໄດ້ເລື່ອງ ປ່ອຍໃຫ້ຄູ່ແຂ່ງຟອມດີກ່ວາ ຫລາຍເທົ່າໂຕ

ມິເກລ ອາເຕຕ້າ ຜູ້ຈັດການທີມ ອາເຊນ່ອລ ເຜີຍວ່າ ຕົນເອງຮູ້ສຶກຜິດຫວັງເປັນຢ່າງສູງ ທີ່ຕ້ອນນີ້ທີມຕົນເອງບໍ່ໄດ້ກຸມຊະຕາໃນການລຸ້ນຕິດທັອບໂຟແລ້ວ ຫລັງຈາກທີ່ “ເຈົ້າປືນໃຫຍ່” ບຸກໄປແພ້ ນິວຄາສເຊິ່ນ ຢູໄນເຕັດ 0-2 ໃນເສິກ ພີເມຍລີກ ອັງກິດ ທີ່ສະຫນາມ ເຊນ ເຈມ ພາກ ມື້ຄືນວັນຈົນທີ່ 16 ພຶດສະພາ ທີ່ຜ່ານມາ

ການເສຍໄຊເຮັດໃຫ້ ອາເຊນ່ອລ ເຮັດໃຫ້ມີໂອກາດຫນ້ອຍລົງທີ່ຈະລຸ້ນຕິດທັອບໂຟ ເພື່ອຄວ້າໂຕລຸຍເສິກ ຢູຟ່າ ແຊ້ມປ້ຽນ ລີກ ລະດູການຫນ້າ ໂດຍປະຈຸບັນ “ເຈົ້າປືນໃຫຍ່” ຢູ່ທີ່ອັນດັບ 5 ມີ 66 ຄະແນນ ຈາກການລົງແຂ່ງ 37 ນັດ ຕາມຫລັງ ທັອດແນມ ຮັອດສະເປີ ທີມອັນດັບ 4 2 ແຕ້ມ ດັ່ງນັ້ນເກມສຸດທ້າຍຂອງລະດູການໃນວັນອາທິດທີ 22 ພຶດສະພາ ພວກເຂົາຈຳເປັນຕ້ອງເປີດບ້ານເອົາຊະນະ ເອຟເອີຕັນ ໃຫ້ໄດ້ໃນສະຖານດຽວ ພ້ອມກັບລຸ້ນໃຫ້ “ໄກ່ເດືອທອງ” ບຸກໄປແພ້ ນໍຣິດ ຊິຕີ້ ທີມຕົກຊັ້ນຮຽບຮ້ອຍ

“ໂດຍປົກກະຕິແລ້ວ ຂ້ອຍມານັ່ງຢູ່ບ່ອນນີ້ ຂ້ອຍສາມາດປົກປ້ອງສິ່ງທີ່ເຮົາເຮັດໄດ້ ແຕ່ມື້ນີ້ຂ້ອຍເຮັດແບບນັ້ນບໍ່ໄດ້ແທ້ໆ ນິວຄາສເຊິ່ນ ຫລິ້ນດີກ່ວາເຮົາຫລາຍເທົ່າ ຟອມການຫລິ້ນຂອງເຂົາດີກ່ວາເຮົາໃນມື້ນີ້ ບໍ່ໄດ້ຢູ່ໃນລະດັບດຽວກັບພວກເຮົາເລີຍ”

“ຂ້ອຍຜິດຫວັງແລະເຈັບປວດທີ່ສຸດ ກ່ອນຫນ້ານີ້(ໂອກາດຕິດທັອບໂຟ) ມັນຢູ່ໃນກຳມືຂອງເຮົາແຕ່ມື້ນີ້ມັນບໍ່ໄດ້ຢູ່ນຳເຮົາແລ້ວ ເຮົາຈຳເປັນຕ້ອງເອົາຊະນະ ເອຟເວີຕັນ ແລະລຸ້ນໃຫ້ ນໍຣິດ ເອົາຊະນະ ສະເປີ ເຊິ່ງໃນເກມບ້ານເຕະຍັງມີໂອກາດເຫລັກນ້ອຍສະເຫມີນັ້ນແຫລະ!” ກຸນຊືໄວ 40 ປີກ່າວ

Mikel Arteta